„Македонија направи многу за безбедноста на Европа, а сè уште се третира како трета земја, па дури и пристапот кон одредени безбедносни инструменти на ЕУ ни е ограничен. Македонија е пример за тоа како една земја може да биде предмет на двојни стандарди кои се граничат со лицемерство“, изјави претседателот на Република Македонија, Ѓорге Иванов, на отворањето на 28. годишна сесија на Форумот Кран Монтана, што се одржува во Барселона.
Иванов во својот говор истакна и дека се надева дека ЕУ и НАТО, како и земјите од регионот, ќе извлечат поуки од погрешниот пристап кон Република Македонија и оцени дека државата успешно се справила со мигрантската криза.
– И покрај сè, останувам оптимист и се надевам дека и ЕУ и НАТО, како и земјите од нашиот регион ќе извлечат поуки од овој погрешен пристап кон Република Македонија. Мигрантската криза ги увери и најголемите скептици во две нешта: прво, дека мала територија не значи и неважна територија и, второ, дека мала земја не значи и мала улога во глобалните процеси. Изборот на Македонија беше хуманост, правичност и еднаков третман кога станува збор за хуманитарниот аспект на мигрантската криза и одлучност и подадена рака за соработка кон сите засегнати, кога станува збор за нејзиниот безбедносен аспект – изјави Иванов.
Македонскиот претседател смета дека Организацијата на Обединетите нации мора да се реформира и да се приспособи кон новата реалност.
– Ова се однесува и на другите меѓународни организации кои не смеат да си дозволат да останат заглавени во 20 век. Напротив, мора да бидат пофункционални за да бидат вистински гаранти на стабилноста. Времето за дејствување е сега – додаде Иванов.
