Борбата против тероризмот не смее да ги ограничи човековите права, порача претседателот Ѓорге Иванов, на форумот што денеска се одржа во Каиро на тема „Демократската безбедност во време на екстремизам и насилство“, во организација Александриската библиотека и на Меѓународниот центар „Низами Ганџави“.
Иванов истакна дека борејќи се против тероризмот и екстремизмот, современата држава ги проширува своите овластувања и надлежности, и со тоа го стеснува просторот на човековите права и слободи.
Тој посочи дека Република Македонија беше првата држава во Европа што прогласи кризна состојба поради заканата од илегалната миграција и ја распореди армијата на границата.
– Но, ние никогаш не ја употребивме кризната состојба за проширување на ингеренциите на државата и за ограничување на човековите права, вклучително и правата на мигрантите – додаде македонскиот претседател.
Тој оцени дека борбата против тероризмот не е доволно да се води само со воени технологии, туку и со идеи и со програми за контрарадикализација.
-Убиството и теророт не се резултат на религијата, туку на погрешното толкување на религијата, на неморалноста на поединците со стврднати срца, арогантни души и со искривена логика. На радикализацијата да се спротивставиме со програми за контрарадикализација – рече Иванов.
За време на работната посета на Арапската Република Египет, предвидено е претседателот Иванов да оствари средба со египетскиот претседател, Абдел Фатах ал Сиси.