Претседателот Ѓорге Иванов нема да го додели мандатот сè додека не се отстранат правните и политичките пречки. Тој на прес-конференцијата со претседавачот на Претседателството на БИХ, Младен Иваниќ, изјави дека не може да донесе одлука која подоцна може да биде оспорена.
– Ако биде оспорена една таква одлука, тогаш ќе биде отворено прашањето за моја одговорност. Затоа барам и инсистирам правната и политичката пречка да бидат отстранети – рече Иванов.
Тој истакна дека не чувствува одговорност за кризата бидејќи го почитува Уставот и дека немаше да има институционалната криза ако ја немаше платформата која од политичка криза воведе во институционална криза.
– Едно е политичката криза што ја решивме со изборите на 11 декември, а со платформата добивме институционална криза. Јас тука не чувствувам одговорност бидејќи го почитувам Уставот и тоа што се бара од мене, а ги имам предвид и одлуките на Уставниот суд и затоа не смеам да донесам одлука што ќе биде оспорена од кого било – рече Иванов.
