!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Иванов му го даде мандатот на Груевски, тече рокот од 20 дена за формирање влада


       
Скопје, 9 јануари, 2017 - 13:48 (META) 

Од денеска почнува да тече рокот од 20 дена во кој мандатарот за составување на новата влада, лидерот на ВМРО-ДПМНЕ, Никола Груевски, треба да поднесе програма и предлог-состав на Владата до Собранието.

Претседателот на државата, Ѓорге Иванов, како што беше најавено, попладнево, дваесетина минути по 13 часот, на кратка свеченост во вилата на Водно му го врачи мандатот на лидерот на ВМРО-ДПМНЕ.

Владата, на предлог на мандаторот и врз основа на програмата, ја избира Собранието со мнозинство гласови од вкупниот број пратеници.

На предвремените парламентарни избори на 11 декември, ВМРО-ДПМНЕ освои најголем број пратенички мандати – 51, СДСМ има 49, ДУИ – 10, Движењето Беса – 5, Алијанса за Албанците – 3 и ДПА освои 2 пратеници.

Груевски сега има 20 дена да состави влада која ќе ја има поддршката од мнозинството од вкупниот број пратеници во Собранието, односно од минимум 61 пратеник.

Партиите од албанскиот блок ДУИ, Движење Беса и Алијанса за Албанците, на Божиќ соопштија дека усвоиле заедничка платформа, која ќе биде нивна основа во преговорите за учество во новата влада.