Претседателот Ѓорге Иванов вечерва во Струга ќе приреди прием за претставниците на дипломатскиот кор, воените аташеа, претставници на меѓународни организации и за почесните конзули во Република Македонија, соопштија од кабинетот на претседателот.
На приемот, кој традиционално се приредува по повод новогодишните и божиќните празници, свои обраќања ќе имаат претседателот Иванов и доајенот на дипломатскиот кор, амбасадорот на Руската Федерација, Олег Шчербак.
Во рамки на дипломатскиот прием, што според воспоставената практика се одржува надвор од главниот град, Иванов и претставниците на дипломатскиот кор утре ќе ја посетат општина Вевчани, каде што е предвидена посета на црквата „Св. Никола“ и на Вевчанските извори.
Традиционалниот прием по повод новогодишните и божиќните празници за претставниците на дипломатскиот кор, изминатите години беше приреден во Битола, Крушево, Гевгелија и во Берово.
