„Во услови на криза, Европската унија не функционира затоа што не може да носи одлуки. Во криза, кога не можете да носите одлуки, тогаш кризата се зголемува и се предизвикуваат многу штети“, изјави претседателот Ѓорге Иванов на 25. Европски форум во Круница Здруј, Полска, на сесијата на тема „Кон флексибилна Европа: Стратегии за иднината“.
– Ние, како и другите земји на Балканот, ја сакаме Европа, не во овој момент да стигнеме до неа, туку да патуваме кон неа. Поважен ни е патот кон неа, отколку самото членство во неа, затоа што сите европски стандарди и принципи се усвојуваат кога почнуваат преговорите. Поглавје по поглавје, како земја, се европеизирате. Тоа ни треба на сите балкански земји, да се европеизираме, да имаме европски стандарди, критериуми и принципи – истакна Иванов.