Еврокомесарот за проширување и за добрососедска политика, Јоханес Хан, денеска во Белград соопшти дека очекува Европската Унија следната недела да постигне договор за отворање нови поглавја во преговорите за пристапувањето на Србија кон Унијата, јавува дописникот на „Мета“ од Белград.
– Голем оптимист сум дека може да се отворат нови поглавја и веројатно следната недела ќе имаме состанок на кој ќе се договориме и ќе го соопштиме тоа – рече Хан по средбата со српскиот премиер, Александар Вучиќ.
Српскиот премиер рече дека сигурно ќе биде отворено едно поглавје (поглавјето за јавни набавки) и оти сè уште не е постигната согласност за отворање на уште две поглавја.
Хан и Вучиќ заедно присуствуваа на потпишувањето на договорот меѓу владата на Србија и Европската комисија за финансирање на реформите во јавната управа во Србија, во вредност од 80 милиони евра. Хан рече дека реформите во јавната управа се невидливи, но многу важи и на долг рок неопходни за администрацијата да се вклопи во европските стандарди.
– Како подарок добиваме 80 милиони евра за поддршка на јавната управа. Тие пари ќе ги видите директно во сето тоа што го правиме и го градиме во Србија – рече Вучиќ, додавајќи дека услов за тоа била стабилна макроекономска рамка.
Тој рече дека Србија го трасирала својот пат како лојален и доверлив партнер, кој сака да биде дел од европското семејство.
– ЕУ може да смета на нас, ние сметаме на ЕУ – рече Вучиќ, на што Хан возврати дека ЕУ и Србија се во „ист чамец“ и оти заемно сметаат една на друга.
