Со задоцнување од повеќе од еден час, претседателот на ВМРО-ДПМНЕ, Никола Груевски, денеска најави пет проекти кои се однесуваат на младите.
Младите до 27 години, како што најави Груевски, ќе добијат бесплатен железнички превоз секој прв и трет викенд во месецот. Бесплатниот превоз, кој ќе се однесува за сите дестинации, ќе може да почне да се користи од март 2016 година. Владата, како што рече лидерот на владејачката партија, ќе ги субвенционира „Македонски железници“.
Груевски најави и бесплатни обуки за компјутерски вештини и за странски јазици за млади до 29 години. Тој рече дека од март 2016 година, 2.000 млади луѓе годишно ќе добијат бесплатна обука за компјутери или ќе стекнат познавање на странски јазик преку бесплатни курсеви.
Претседателот на ВМРО-ДПМНЕ, исто така, најави и изградба на перални и на сушални во 10 државни студентски домови во Македонија. За таа цел, ќе бидат набавени 50 машини за перење и 50 за сушење, кои ќе бидат распределени низ домовите.
Во согласност со програмата за млади, Груевски најави и изградба на фитнес-зони во 18 градови низ Македонија и тоа во централните градски паркови. За овој проект ќе биде набавена соодветна фитнес-опрема за вежбање.
Отворање читални во Струмица, Аеродром и во Велес е последниот проект што денеска го најави Груевски на денешната промоција пред членовите на УМС на ВМРО-ДПМНЕ.
– Јас го ветувам она што сум сигурен дека можам да го остварам. Некои други можат да ветат повеќе, но силата не е во тоа колку повеќе ќе се вети, туку колку повеќе ќе се исполни. Досега покажавме дека можеме со инвестиции да отвориме нови работни места. Со нашите дела за девет години се вработени 150.000 млади луѓе – изјави Груевски.
