Грчкиот туризам и приливот на странски туристи во Грција се движел во нагорна линија изминатата година. Грчкиот завод за статистика објави дека во 2015 година имало повеќе од 26 милиони странски туристи и посетители.
Бројот на македонски туристи, стандардно, бил во пораст и минатата година. Според бројките на Заводот за статистика, од Македонија имало 2,7 милиони посетители, односно за 26,1 отсто повеќе во споредба со 2014 година.
Според анализите на заводот, во периодот од јануари до септември имало повеќе од 20 милиони посетители, за 8,6 отсто повеќе од истиот период претходната година. Голем број туристи пристигнале во Грција со автомобил, околу 7 милиони, што се смета за пораст од 13,9 отсто. Авионски, пак, пристигнале околу 13 милиони туристи. Авионскиот туризам сè уште е доминантен во Грција и според Заводот за статистика, покрива околу 63 отсто од сите пристигнувања на странски туристи во Грција.
Побројни биле македонските, германските и британските туристи, кои важат за најбројни во Грција. Во 2015 година пристигнале околу 2,3 милиони туристи од Германија, пораст за 17,8 отсто во споредба со 2014 година, и повеќе од 2,1 милиони Британци. Бројни биле и италијанските, бугарските, турските, но и американските туристи.
Во опаѓање е, пак, бројот на туристи од Русија, пазар кој грчките туристички работници подолго време се трудат да го развијат и да привлечат посетители не само кон грчките плажи, туку и преку црковниот туризам, кон грчките цркви и манастири. Во 2015 година бројот на руски туристи се преполовил, па пристигнале само 441.350 туристи, бројка која важи за драстично опаѓање од 62 отсто во споредба со 2014 година, што е можен индикатор за проблеми во грчко-руските односи.
