Граѓаните од поплавените подрачја и денеска може во Министерството за финансии да ги пријават деловните банки во кои сакаат да им биде исплатен авансот.
Владата одлучи семејствата од поплавените подрачја да добијат по 30.000 денари аванс, а вкупното авансно обесштетување ќе изнесува 2,5 милиони евра.
Од Министерството за финансии посочуваат дека сите лица кои беа евидентирани од Комисијата за проценка на штетите во подрачјата зафатени од поплавите во Скопскиот и во Тетовскиот Регион ќе бидат опфатени со авансната исплата на средства, во согласност со динамиката со која податоците стигнуваат во Министерството за финансии.
Пријавувањето почна во саботата и во изминатите два дена голем број лица ги имаат доставено податоците за банките, а се прибираат исклучиво за лицата што се наоѓаат на списокот што е доставен од страна на Комисијата за проценка на штета.
