Градежната комора при Сојузот на стопански комори ги демантира информациите од објавената анализа на консултантската компанија „Фортон Македонија“ за висината на чинењето на производната цена на квадратен метар станбен нето-простор и процентот на профитот на компаниите.
– Во формирањето на цената на становите, покрај градежните трошоци, со голем процент учествуваат локацијата, односно градежното земјиште, потоа комуналиите, трошоците за проектирање, ревизии и за надзор, приклучоците, енергетската ефикасност што најчесто е од А-класа што значително ги крева трошоците во производството и ангажираните средства на инвеститорите – изјави денеска на прес-конференција Ивица Јакимовски од Групацијата за високоградба при Градежната комора.
Според Јакимовски, произлегува дека профитот на градежните компании во оваа дејност реално е околу 10 проценти до 15 проценти, а не како што „лажно се претстави во јавноста дека профитот е за речиси 50 проценти.“
– Купувачите на станови во Скопје плаќаат нето, а добиваат бруто-површина, што значи заеднички површини, како влезови, скали, ѕидови, ходници, лифтови, кои се 30 проценти од површината на станбениот објект. Тие не се вклучени во продажната цена на становите, а станарите ги добиваат во сопственост во идеален дел со купување нето-површина – објасни Јакимовски.
