Градот Скопје од вчера почна со третирање на градските сообраќајници со калциум магнезиум ацетат, како една од мерките за намалување на загадувањето на амбиентниот воздух.
Градската администрација информира дека со ова средство во наредниот период ќе се третираат булеварот Свети Климент Охридски и улиците Свети Кирил и Методиј и Јордан Мијалков во централното градско подрачје, како и булеварот Трета македонска бригада и булеварот Србија во Општина Аеродром.
Брзината на улиците каде што ќе се аплицира средството калциум магнезиум ацетат ќе биде ограничена на 40 километри на час, поради можна појава на лизгавост на коловозот.
Калциум магнезиум ацетат е средство кое се користи за контрола и намалување на ситната прашина (ПМ10 и ПМ2,5-честичките) и за стабилизација на патиштата. Средството е еколошки производ кој е биоразградлив, не е штетен за растенијата и не е корозивен.
За реализација на овој процес, јавното претпријатие „Комунална хигиена“ минатата година специјално адаптираше шест од новите возила.
