Генералниот секретар на Регионалниот совет за соработка (РСС), Горан Свилановиќ, е добитник на наградата „Д-р Елмер Хантош“, за унапредување на сооработката во регионот на Југоисточна Европа, што ја доделува Централноевропската фондација, соопшти РСС.
Наградата е доделена за промоција на соработката во Југисточна Европа и интеграциските процеси на државите кон Европската Унија, што се вклопува и во напорите за продлабочување на економската соработка во Централна и во Источна Европа, цели на кои работи Централноевропската фондација.
Свилановиќ е прв човек на Регионалниот совет за соработка, меѓувладино тело на земјите членки на Процесот за соработка во Југоисточна Европа, чиј основач и полноправна членка е и Македонија.
Претходно, Свилановиќ беше министер за надворешни работи во Србија и Црна Гора, ги водеше и процесите за демократизација и за унапредување на човековите права при Пактот за стабилност, а подоцна беше и координатор на економските и еколошките активности во ОБСЕ.
