Лекарот гинеколог Казимир Копривњак, кого Основното јавно обвинителство Тетово го товари за тешки дела против здравјето на луѓето, на денешното прво судско рочиште изјави дека не се чувствува виновен за смртта на 33-годишната Виолета Кировска.
Според обвинителниот акт, Копривњак на 19 август минатата година при породувањето на Кировска не ги презел сите превентивни мерки, поради што пациентката починала.
Јавниот обвинител Зулќуфли Ракипи рече дека гинекологот почнал царски рез без претходно да обезбеди потребно количество крв. По настанато крвавење, не извршил веднаш медицинска интервенција, со која можел да го спречи настанувањето на хеморагичниот шок, туку интервенцијата ја извршил со задоцнување.
На денешното судско рочиште по барање на одбраната, поради обезбедување дополнителни докази, судијата Хајрула Идризи ја одложи главната расправа. На рочиштето беше сослушан медицинскиот персонал од Клиничката болница Тетово.
– Кај пациентката имаше мало крвавење, а по изведувањето на царскиот рез, состојбата ѝ се стабилизира. Но, по извесен период, по полноќ, доктор Копривњак ми рече дека пациентката почнала да крвави и треба да ѝ се изврши отстранување на матката – изјави д-р Јован Костовски, кој асистирал во оперативниот зафат на Кировска.
Началникот на гинеколошкото одделение при Клиничката болница Тетово, д-р Нагип Руфати, изјави дека тој го извршил остранувањето на матката.
Од одбраната на обвинетиот засега, како што изјавија, не сакаат да коментираат за судскиот процес. Застапникот на семејството Кировски изјави дека Основното јавно обвинителство има доволно докази да го осуди Копривњак.
Следното рочиште е закажано за 14 април.
