„Институциите кои за време на катастрофалната поплава минатата година во која загинаа 23 лица, беа раководени од кадри на ВМРО-ДПМНЕ, целосно потфрлија. Неспособноста на институциите и на градоначалниците на Скопје и на Гази Баба создадоа дополнителни проблеми со кои граѓаните се соочуваат и денес“, изјави денеска на прес-конференција Борче Георгиевски, претседател на ОО СДСМ – Гази Баба.
– Наместо да ги решаваат проблемите на граѓаните од овие населени места, градоначалниците од ВМРО-ДПМНЕ, Коце Трајановски и Тони Трајковски, се грижат единствено за тендерите и за своите бизнис-интереси. И по цела година од поплавите, сè уште постојат подрачја што не се целосно санирани. Таков е примерот и со северната обиколница, чијашто санација беше дадена на сомнителен тендер на фирмата „Трансмет“ за договорена сума од 4 милиони евра, а сè уште не е готова и не е ставена во употреба. Дополнително, во селата Виниче, Страчинци, Сингелиќ и Инџиково, сè уште има преку 100 хектари земјоделска површина која граѓаните не може да ја обработуваат поради нерасчистените наноси и оштетувања од природната непогода – изјави Георгиевски.
Според Георгиевски, селективниот пристап на ВМРО-ДПМНЕ и нерешавањето на проблемите на граѓаните од погодените подрачја е срамно и недозволиво.