„Сведоци сме на почетокот на медиумскиот мрак кој на дело го спроведува новата северно-корејска влада на Република Македонија. Имено, вчера неколку македонски медиуми објавија дека раководни лица во Владата селективно забраниле пристап на компјутерите на вработените до порталите „Курир“, „Инфомакс“, „Јавно“, „ТВ Нова“ и уште десетина други“, изјави денеска пред Владата Коче Гаврилов, член на ИК на УМС на ВМРО-ДПМНЕ.
– Скандалозно е само по себе цензурирањето кое на дело се спроведува. Денес тоа е забрана во Владата на Република Македонија, утре тоа може да се однесува на сите државни институции, а на крај може да заврши со целосна забрана за нивно работење. Сè уште се свежи сеќавањата за директните закани кои ги добиваа новинари од овие медиуми, на кои им праќаа пораки дека ќе ги влечат по улици, на кои им кршеа простории и на кои директно вербално, па дури и физички им се закануваа – вели Гаврилов.
Според него, новата влада со ова покажала дека е подготвена на целосна ликвидација на медиумите кои известуваат за нивната работа објективно и додаде дека ВМРО-ДПМНЕ бара сите новинарски и медиумски здруженија да ја осудат ваквата постапка.
