Поради законските измени за плаќање придонеси за хонорарците, филмските работници во Македонија испратија отворено протестно писмо до Владата.
Во писмото се вели:
„Ние, филмските работници на Република Македонија, сме крајно загрижени за ефектите што ќе ги предизвикаат законските измени за плаќање придонеси за хонорарците во филмската дејност. Како начин на функционирање, филмот е природно поврзан со хонорарното работење и најголем дел на луѓето што ја сочинуваат браншата се хонорарци. Со новите регулативи, филмаџиите стравуваат дека крајниот исход ќе биде неминовно намалување на и онака скромните средства што се заработуваат во текот на годината. Тоа е еден непремостлив јаз за најголемиот дел од луѓето, а некои ќе бидат принудени да ја напуштат филмската дејност и да си бараат друг начин за егзистенција. Филмот е благородна, но и тешка уметност и за да се истрае, ние филмаџиите работиме со силно чувство на заедништво. Доколку повредите еден, сте ги повредиле сите. За жал, со новите законски измени, ние мислиме дека е невозможно да се најде модел кој би ги ублажил последиците од зголемените даноци, а како резултат на тоа, неминовно ќе се створи голема нетрпеливост меѓу работниците и сето тоа ќе резултира со намален квалитет и желба за вложување во филмот. Токму поради наведеното, апелираме до Вас да размислите уште еднаш за последиците што можат да настанат од овој закон додека штетата не е направена.“
