Европската комисија ќе го почитува потврдниот исход од референдумот за независност на Каталонија, соопшти претседателот на Европската комисија, Жан-Клод Јункер, додавајќи дека регионот не треба да очекува по гласањето веднаш да стане членка на ЕУ.
– Комисијата не се вклучува во интерните, домашни дебати во земјите членки – истакна Јункер, додавајќи дека дискусијата за референдумот во Каталонија е хипотетичка затоа што Шпанија не го признава референдумот.
Јункер истакна дека Каталонија, доколку прогласи независност, ќе мора да ги следи истите процедури на Унија како и членките кои биле примени во 2004 година. Тој рече дека истите принципи би се применувале и во случај на независност на Шкотска.
Властите на Каталонија ветија одржување референдум на 1 октомври, додека шпанскиот премиер Маријано Рахој порача дека ќе го спречи одржувањето на референдумот по секоја цена.