Претседателот на Турција, Реџеп Таип Ердоган, денеска одобри одржување национален референдум за уставните реформи кои му овозможуваат на претседателот зголемени овластувања.
Ердоган ја потпиша реформата за Уставот, со што е отворен пат за референдум за воведување на претседателскиот систем што ги проширува неговите овластувања.
Референдумот по тоа прашање најверојатно ќе биде одржан на средината од април.
Турскиот парламент минатиот месец одобри уставни реформи со минимално потребниот број гласови. Од 550 пратеници, само 488 гласаа, од кои 399 за поддршка на реформите, а 142 против.
Со измените на уставот, претседателот ќе може да именува министри и високи функционери, да го распушти парламентот, да прогласи вонредна состојба, да издава декрети и да именува половина од членовите на највисокото судско тело.
Бројот на пратеници во парламентот ќе биде зголемен на 600, минималната старосна граница на пратениците ќе биде намалена на 18 години и се предвидува одржување на парламентарни и на претседателски избори на секои пет години.
Опозицијата на измените гледа како обид на Ердоган, кој де факто воспостави претседателски систем од стапувањето на должност во 2014 година, дополнително да си ја зголеми власта.
