Експлозивна направа е фрлена на американската амбасада во Киев, но нема повредени во инцидентот, соопшти киевската полиција.
Полицијата ноќеска добила известување дека нешто по полноќ по локално време (23 часот по централноевропско време) се случила експлозија во кругот на амбасадата на САД во Киев, се наведува во соопштението.
Амбасадата се наоѓа во централниот кварт Шевченковски.
„Непознато лице фрли експлозивна направа на територијата на амбасадата. Никој не е повреден во експлозијата“, се наведува во соопштението и се додава дека е отворена истрага во врска со терористичкиот чин.
Портпаролката на киевската полиција соопшти дека експлозијата се третира како „акт на тероризам“.
Претставник на американската амбасада соопшти дека амбасадата продолжува нормално да функционира.
