Маж и жена загинале во две одвоени сообраќајки близу Македонска Каменица денеска.
Според СВР Штип, на магистралниот пат на потегот од селото Истибања до Македонска Каменица, на свиокот во близина на рибникот „Саваро“, загинал 51-годишен маж од селото Облешево. Возилото „махиндра“ со кое управувал, претпладнево излетало од коловозот и тој на местото на несреќата починал од добиените повреди.
Три часа подоцна на влезот од Македонска Каменица, на патот кој води до селото Цер, дошло до судир меѓу автомобил „форд“ со регистерски таблички од Македонска Каменица и автомобил „фолксваген“ со скопски таблички. Во судирот животот го загубила 75-годишна сопатничка во „фолксвагенот“, а нејзиниот 55-годишен син, кој управувал со автомобилот, е повреден.
Според СВР Штип, за неполни девет месеци на патиштата во Источна Македонија загинале 20 лица.
