Во Собранието на Република Македонија составот на работните тела е одраз на бројот на пратеници, при што парламентарното мнозинство ги носи одлуките, честопати без поддршка од опозициските партии, велат од Демократскиот сојуз.
„При изборот на составот на комисиите, доколку не може да се постигне консензус, тогаш партиите што имаат мнозинство одлучуваат. Во спротивно, доколку опозицијата инсистира на мнозинство во комисиите и да раководи со нив, ќе се случува блокада на работата на парламентот“, стои во соопштението на партијата на поранешниот пратеник Павле Трајанов.
Од ДС велат дека опозицијата треба да има мнозинство во комиисиите кои вршат контрола и надзор над службите за безбедност и институциите кои можат да вршат контрола над средствата за јавна комуникација (прислушување), но со комисијата за избори и именување и комисијата за имунитетско-мандатни прашања, секогаш раководеле пратеници од партиите што имаат мнозинство во парламентот.
„Демократскиот сојуз укажува на потребата од разумно однесување, деблокирање на работата на Собранието и избор на реформска влада, како битен услов за стабилизирање на државата, нормализирање на животот на граѓаните и за спроведување на коренити реформи, клучни за евроатланските перспективи на Македонија“, велат од партијата.
