Државниот завод за ревизија (ДЗР) во периодот јули-септември 2017 година, објавувал една или ниедна вест во секој месец, а така било и во претходниот квартал. Сепак, ефикасно си ја сработил работата во минатата година, а годинава предвидел поголем обем на работа од лани, стои во извештајот за неговата работа подготвен од Фондацијата за демократија на Вестминстер (WFD), Центарот за економски анализи (ЦЕА) и Институтот за комуникациски студии (ИКС).
Сите ревизорски извештаи од Годишната програма на ДЗР за 2016 година се реализирани и објавени и е започнато со тековно објавување на дел од ревизорските извештаи од Годишната програма за 2017 година, според која треба да изврши ревизии на 58 субјекти, односно 53 за ревизија на регуларност, додека за пет субјекти на ревизија ќе се врши ревизија на успешност. Во споредба со лани, годинава се предвидени 14 ревизии на регуларност повеќе.
За извештајот се оценувала и запознаеноста на пратениците со работата на ДЗР, при што се добиени голем број одговори дека ревизорските извештаи треба да се разгледуваат на повисоко ниво, односно во соодветна Комисија во Собранието на Република Македонија, на собраниска седница или во Комисијата за финансирање и буџет.
При презентацијата е ставен акцент на можноста граѓаните да поднесуваат барања за ревизија, која постои, но најголемиот дел од луѓето не се информирани за неа.
