ДМ: Во Македонија нема од спорните кашички


       
Скопје, 10 јануари, 2018 - 14:19 (META) 

Спорните еко-кашички за бебиња повлечени од некои земји, во Македонија воопшто ги нема во продажба, соопшти денеска синџирот продавници за козметика „ДМ“.

„Наведениот производ со спорниот рок на траење никогаш не бил испорачан во нашите дрогериии и никогаш не бил ставен во продажба за нашите потрошувачи“, информира „ДМ“.

Компанијата ги повикува потрошувачите кои набавиле од проблематични кашички во некоја друга земја да ги донесаат во продавниците на „ДМ“ во Македонија и спорниот производ ќе биде заменет со нов или средствата ќе им бидат вратени во целост.

„Babylove“ кашичката за бебиња од јагода, малина и јаболка, со нето-тежина 190 грама и рок на траење до 5 јули 2019 година, наменет за деца постари од четири месеци, е повлечен од продажба поради мерки на претпазливост откако во примерок се пронајдени остатоци од средства за чистење кои содржат хлор.