This page was exported from Meta.mk [ http://meta.mk ]
Export date: Mon Nov 20 0:11:08 2017 / +0000 GMT

Димитров за „Скај њуз“: Ако не ни се допадне во ЕУ, ќе го следиме примерот на Британија




Тие што се внатре често забораваат колку е студено надвор, изјави шефот на македонската дипломатија, Никола Димитров, за „Скај њуз“, одговарајќи на прашање што очекува од Велика Британија која излегува од Европската Унија.

- Ако не ни се допаѓа, ќе го следиме вашиот пример. Но, во Лондон сум да ја добијам поддршката од најстарата демократија во светот за тоа што сметам дека е надежна иднина за Македонија. Успеавме да излеземе од длабока морална криза, посилни и позрели – рече Димитров.

На прашањето што е толку привлечно во ЕУ, имајќи предвид дека Британците одлучиле да ја напуштат, Димитров го истакна владеењето на правото, слободата на медиумите и просперитетот.

- Во време кога светот станува понесигурен, сметаме дека ќе бидеме побезбедни и ќе имаме подобар просперитет и иднина ако сме дел од ЕУ. Сметаме дека подобро можеме да се справиме со предизвиците ако дејствуваме заедно, како, на пример, за справувањето со бегалците и со мигрантите, климатските промени и со тероризмот – рече Димитров, додавајќи дека Балканот ќе биде посреќно место ако е дел од ЕУ.

Во однос на бегалската криза, Димитров изјави дека Европската Унија треба да продолжи да ја поддржува Турција, бидејќи договорот ЕУ - Турција направил голема разлика и оти балканската рута треба да остане затворена. Тој истакна дека треба да се поддржува и Грција, затоа што надворешната граница на ЕУ е на грчко-турската граница.

- Мигрантската криза покажа колку Балканот е важен за безбедноста на Европа - рече Димитров.

YouTube Video: YouTube.com/watch?v=8AwPhNeHzFI

Post date: 2017-09-13 15:07:32
Post date GMT: 2017-09-13 13:07:32
Post modified date: 2017-09-13 15:07:32
Post modified date GMT: 2017-09-13 13:07:32
Powered by [ Universal Post Manager ] plugin. HTML saving format developed by gVectors Team www.gVectors.com