Министерот за надворешни работи, Никола Димитров, в среда во Вашингтон ќе учествува на конференција во организација на Атлантскиот совет на САД, насловена „Следната бура? Обликување на балканската иднина во ера на неизвесност“.
На Конференцијата, како што соопштуваат од МНР, ќе учествуваат министрите за надворешни работи на балканските земји и повеќе од стотина експерти од двете страни на Атлантикот.
Учесниците ќе разменат мислења во насока на генерирање нови идеи и предлози за забрзан пат на Балканскиот Регион кон трансатлантската заедница и за поттикнување засилена поддршка за политиките на земјите во Соединетите Американски Држави.
Димитров ќе се обрати на панел-дискусијата „НАТО на Балканот: Обезбедување на границите во турбулентни времиња“, а за време на дводневната посета на САД ќе има средби со високи претставници на американската администрација, Стејт департментот, Конгресот на САД и на невладиниот сектор, како и на македонската дијаспора во Вашингтон.