На денешната седница на Државната изборна комисија (ДИК) беа усвоени упатствата за начинот и за постапката за поднесување, прием и за потврдување на кандидатските листи за локални избори, за важечки и неважечки гласачки ливчиња, како и за утврдување на личниот идентитет на гласачот.
За важечко гласачко ливче ќе се смета ако е заокружен редниот број пред подносителот на листата, односно редниот број пред кандидатот за кој гласачот се определил да гласа. За важечко ќе се смета и тоа гласачко ливче од кое на сигурен и недвосмислен начин може да се утврди за која листа на кандидати гласал гласачот.
Во однос на неважечките ливчиња, претседателот на ДИК, Александар Чичаковски, истакна дека е консултирана меѓународна анализа која покажува дека бројот на неважечки гласачки ливчиња во земјите од Централна и од Источна Европа се движи меѓу пет и седум отсто од искористените гласачки ливчиња на националните избори, а за локалните избори се движи дури до 9 отсто.
Генералниот секретар на ДИК, Добре Јанковски, информираше дека не може да бидат исплатени средства за надоместок на трошоците за последните избори на Движењето Беса поради тоа што жиро-сметката на партијата не била активна, по што Комисијата одлучила да достави информација во врска со овој случај до Собранието, до Државниот завод за ревизија и до Беса.
Атанас Урумов, член на ДИК, информираше дека се направени сите подготовки за рефендумот за Казандол во Дојран, кој треба да се одржи в недела. Испечатени се осум изводи од избирачкиот список, а право на изјаснување имаат 2.747 лица.
