Регионалната стабилност и мирот се високо во приоритетите на Владата и токму затоа активно работиме на безбедносната соработка. Ова е особено важно бидејќи новите безбедносни предизвици најчесто ги надминуваат капацитетите на една држава. Резултат на ваквата владина политика се договорите со Грција и со Бугарија.
Ова го истакна вицепремиерката и министерка за одбрана Радмила Шекеринска на отворањето на Годишниот состанок на претставниците на комисиите за одбрана и безбедност од Парламентите на земјите во ЈИЕ, чиј домаќин е Комисијата за одбрана и безбедност при македонското Собрание во соработка со Центарот за безбедносна соработка – РАКВИЈАК.
– После долги години застој и проблеми Македонија и Грција успеаја да најдат решение за веќе тридеценискиот проблем. Овој историски договор дојде неполна година по Договорот со Бугарија. Овие два договора покажаа дека во Македонија состојбите се менуваат од корен, но тие ќе беа залудни доколку институциите на Македонија не покажаа политичка волја и резултати и во делот на домашните реформи – рече Шекеринска.
Според неа, нема безбедност без слободни медиуми, без слободни и демократски избори, без вистинска контрола, посебно врз разузнавачкиот систем, без модерна војска прилагодена на модерните предизвици.
Претседателот на Собранието, Талат Џафери, вели дека Република Македонија со овие договори не само што ги уреди билатералните односи со соседите, не само што го деблокира својот пат кон евроатлантските организации, туку дава историски придонес во стабилноста, мирот и евроатлантсклата перспектива.
– Западен Балкан се помалку личи на буре барут и мислам дека сите заедно, му даваме многу јасна европска перспектива. А како се дојде до сето ова? Прво е политичката волја на актуелните политички лидери и актуелните влади овие проблеми и антагонизми да се решат. До решението се дојде само преку дијалог и отвореност за аргументите и на едната и на другата страна. Законот за ратификација на Договорот со Грција помина во Парламентот. Јас очекувам дека и сите други државни институции, вклучително и претседателот на државата ќе го почитуваат Уставот и парламентарната демократија. А дали овој Договор ќе биде имплементиран или не сепак на крајот ќе одлучат граѓаните на референдум, а ние како одговорни политичари таа волја ќе мора да ја почитуваме – рече Џафери.
Директорот на центарот за безбедносна соработка – РЕКВИЈАК, Хајард Берг вели дека е среќен што е во Скопје во критичен период. Меѓу другото во обраќањето на годишниот состанок порача да се разменат добрите практики на парламентарниот надзор од земјите на Југоисточна Европа.
