!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Денеска ќе се конституира деветтиот собраниски состав


       
Скопје, 30 декември, 2016 - 9:53 (META) 

Собранието на Република Македонија денеска во 13 часот ќе ја одржи конститутивната седница на новиот состав, на која треба да бидат верифицирани мандатите на новоизбраните пратеници и да биде избран новиот претседател на законодавниот дом.

Конститутивната седница во средата ја свика претседателот на Собранието во заминување, Трајко Вељаноски, веднаш откако Државната изборна комисија (ДИК) им ги врачи уверенијата на кандидатите што освоија пратенички места на предвремените парламентарни избори на 11 декември.

Избор на претседател и членови на Верификационата комисија на Собранието на Република Македонија, верификација на мандатите на пратениците во Собранието на Република Македонија, избор на претседател, заменик на претседателот, членови и нивни заменици на Комисијата за прашања на изборите и именувањата на Собранието на Република Македонија, избор на претседател на Собранието на Република Македонија се на дневниот ред на денешната седница, соопштија од Собранието.

Политичките партии што освоија мандати вчера одржаа координативна средба со Вељаноски, околу деталите за денешната конститутивна седница.

По средбата, генералниот секретар на СДСМ, Оливер Спасовски, го оспори планот со седницата да претседава собранискиот спикер во заминување, Трајко Вељаноски. Спасовски, повикувајќи се на деловникот на Собранието, рече дека со конститутивната седница треба да претседава најстариот меѓу избраните пратеници (Бранко Маноиловски од ДУИ, н.з.), а не Вељаноски.

Новиот деветти собраниски состав ќе има 120 пратеници и нема да има пратеници од дијаспората поради недоволниот број освоени гласови од кандидатите.

На предвремените парламентарни избори, коалицијата предводена од ВМРО-ДПМНЕ освои 51 пратеничко место, коалицијата предводена од СДСМ – 49, ДУИ – 10, Движење Беса – 5, Алијанса за Албанците – 3 и ДПА – 2 пратенички места.