Откако вчера Владата усвои повеќе предлог-мерки за унапредување на состојбата на македонскиот јазик, денеска мерките ќе ги образложи проф. д-р Људмил Спасов, претседател на Советот за македонски јазик. За мерките ќе зборува и владиниот портпарол Миле Бошњаковски.
Според тоа што вчера го соопшти Министерството за култура, со мерките се предвидува и формирање фонд за поддршка на афирмирањето на македонскиот јазик на странските универзитети, како и формирање фонд за поддршка на изработка на научни дела посветени на македонскиот јазик од сите области.
Пакетот мерки предвидува и дополнување, преработка и доработување на електронските бази, документи, книги, списи од развојот на македонскиот јазик од страна на стручни лица, како и обновување на родните куќи и создавање музеи посветени на значајните личности за македонскиот јазик и македонската култура, како и понатамошна поддршка на постојните по принципот на Куќата на Конески во Небрегово.
Исто така, со мерките се предлага формирање на постојан одбор за стандардизација на македонскиот јазик, кој би бил составен од експерти и би ги решавал ад хок проблемите што се појавуваат во практиката, а за кои нормата не пропишала решенија.
