Велика Британија ќе одржи референдум за членството во ЕУ до крајот на 2017 година, изјави денеска кралицата Елизабета Втора, изнесувајќи го законодавниот план на новоизбраната влада во парламентот.
– Ќе биде донесен закон кој би обезбедил референдум за членството во Европската унија пред крајот на 2017 година. Мојата влада ќе преговара за односот на Обединетото Кралство со Европската унија и ќе бара реформи во ЕУ за доброто на сите земји-членки– рече британската кралица во својот традиционален говор на почетокот на работата на парламентот.
Британскиот премиер Дејвид Камерон, чија Конзервативна партија победи на изборите во мај, планира до крајот на 2017 година да распише референдум за членството во ЕУ, а дотогаш да ја преиспита улогата на неговата земја во ЕУ.