Генералниот секретар на Обединетите нации, Бан Ки-мун, го поздрави договорот помеѓу САД и Русија за прекин на огнот во Сирија, оценувајќи дека тој претставува долгоочекуван сигнал за надеж за сириските граѓани.
„Договорот, пред сè, е долгоочекуван сигнал за надеж за сириските граѓани кои пет години чекаа за нивните страдања да бидат завршени“, се вели во соопштението на Бан Ки-мун.
Тој апелираше до сите вклучени страни во сирискиот конфликт да го почитуваат постигнатиот договор и додаде дека преостанува уште многу работа за тој да биде целосно применет.
Бан Ки-мун оцени дека договорот придонесува да се создадат услови за повторен почеток на политичките преговори за Сирија, кои беа прекинати на почетокот од овој месец.
Стејт департментот денеска соопшти дека САД и Русија постигнаа договор за престанок на огнот во Сирија, кој ќе стапи на сила на 27 февруари.
