Жалбата за мерката на претпазливост која ѝ беше одредена на уредничката на телевизија Сител, Ивона Талевска, е одбиена и таа останува без патна исправа, стои во одлуката на Апелацискиот суд Скопје која беше денеска објавена на веб-страницата на судот.
Ивона Талевска е обвинета за даночно затајување во случајот на СЈО наречен „Тифани“. Нејзиниот пасош е одземен и таа треба еднаш месечно да се јавува во суд. Таа се пожали на мерките за претпазливост што и ги определи Основен суд Скопје 1 на барање на Специјалното јавно обвинителство, но Апелација не и ја прифати жалбата.
Во нејзината жалба беше образложено дека ѝ е потребен пасошот за службени патувања, но судот смета дека таа може да избега ако ѝ биде вратен.
Скопска Апелација ја одби и жалбата на Јован Боцевски и за него е потврдена првостепената одлука секој работен петок во месецот да се јавува во Основен суд Скопје, но дополнително е изречена забрана да одржува контакти со лицето Д.Т..
Идентично како за Боцевски е решено и по жалбите на Петар Милошевски, Новица Станковски, Метуш Шабани и на Филип Атанасов.
