Александар Димитриевски за сторијата „Субвенции за растително и сточарско производство“, објавена на „Призма“ ја доби првата награда за истражувачко новинарство за 2016 година која ја доделува Делегацијата на Европската Унија.
Втората награда ја доби Зоран Јовановски за сторијата „Пеплишта на смртта“ објавена во емисијата „360 степени“ на „Алсат М“ телевизија.
За најдобра сторија за млад новинар наградена беше Славица Филиповска за приказната „Бугарски пасоши за чиста Македонија“ објавена во „360 степени“.
Самуел Жбогар, шефот на делегацијата на Европската Унија во Македонија рече дека истражувачкото новинарство се бори против корупцијата и организираниот криминал.
– Да се биде истражувачки новинар е стресно, тешко и понекогаш опасно. Но новинарите се храбри и тврдоглави во нивната работа. Светот не е бајка но тие придонесуваат во демократијата и владеењето на правото. Во име на ЕУ сакаме да им искажеме почит за работата и за борбата за вистината – рече Жбогар.
За наградата на ЕУ оваа година пријавени биле 26 автори со 32 стории.
Жирито кое одлучи за годинешните награди беше составено од Марина Тунева извршен директор на Советот за етика во медиумите, Арта Тахири од „Алсат М“, Лирим Дулови од „Коха“ и Борис Георгиевски од македонската редакција на „Дојче Веле“.
