Албанската пратеничка Луиза Џувани денеска поднесе оставка, откако полицијата го приведе нејзиниот син поради престрелката во ноќен клуб, во која загинаа четири лица.
Како што соопшти полицијата, пукањето во тиранскиот ноќен клуб „Анте гранд“ почнало по жолчна расправија, во која учествувал и синот на пратеничката од владејачката Социјалистичка партија. Во престрелката се убиени четири лица, а двајца се повредени.
Полицијата го приведе Констандин Џувани и уште две лица, кои се главни осомничени за престрелката во клубот што се наоѓа на 100 метри од американската амбасада во Тирана.
Албанската актерка и пратеничка Луиза Џувани ја соопшти својата оставка на прес-конференција, која ја одржа заедно со премиерот Еди Рама.
