Пред почетокот на седницата на претседателството на ДУИ, лидерот на партијата, Али Ахмети, изјави дека лидерството на ДУИ денеска ќе разговара за формирањето на владата и за уставните можности за конституирање на парламентот.
– На седницата ќе се зборува за актуелната политичка состојба, за надминување на политичката криза и за формирање на државните институциите, зашто ескалацијата на состојбите не оди во прилог никому. Ќе се разговара и за понатамошните чекори на ДУИ околу формирањето на владата и за уставните можности за конституирање на парламентот – рече Ахемти.
На новинарско прашање дали треба народот да се плаши од ескалации, тој рече дека политичката криза може да се надмине само со политички средства, а не со протести.
– За евентуална ескалација, ние не треба да се плашиме ниту од политичките партии ниту, пак, од поединци, но сите треба да покажеме одговорност. Политичката криза може да се надмине само со политички средства, а не со протести – додаде Ахмети.
Лидерот на ДУИ истакна дека партијата ќе консултира експерти околу формирањето влада и собрание, па потоа ќе донесе одлука.
